DSX hərbçilərinin düşdüyü qəzada yaralananların SİYAHISI

147

Cəbrayıl rayonunda Dövlət Sərhəd Xidmətinin (DSX) hərbi qulluqçularının düşdüyü qəzanın təfərrüatı və yaralanan hərbçilərin adları məlum olub.

Sosialmedia.az “Qafqazinfo”a istinadən əldə etdiyi məlumata görə, DSX-yə məxsus UAZ-ın çırpıldığı yük maşını işğaldan azad edilmiş ərazilərdə yenidənqurma işləri ilə məşğul olan “Kalyon RSY” şirkətinə məxsus olub.

Belə ki, “N” saylı hərbi hissənin giziri, 1995-ci il təvəllüdlü Pərviz Qaraşovun idarə etdiyi xidməti avtomobil Cəbrayılın Şükürbəyli kəndində hərəkətdə olarkən şirkətə məxsus olan və Ucar sakini, 1963-cü il təvəllüdlü Etibar Muradovun sürdüyü “Howo” markalı yük maşını qəfil onun qarşısına çıxıb.

Nəticədə sərhədçilərin olduğu avtomobildə olan hərbçilər:

Gizir, 1995-ci il təvəllüdlü Pərviz Qaraşov;

Baş çavuş, 1998-ci il təvəllüdlü Elmir Abbasov;

Baş çavuş, 1988-ci il təvəllüdlü Elşən Kərimov;

Baş çavuş, 1985-ci il təvəllüdlü Bəhruz Nəzərov;

Gizir, 1992-ci il təvəllüdlü Faiz Mürşüdov;

Kiçik gizir, 2001-ci il təvəllüdlü Asif Dünyamalıyev müxtəlif dərəcəli bədən xəsarətləri alıblar.

Yaralılar dərhal Füzuli Rayon Mərkəzi Xəstəxanasına çatdırılıb. Tibbi müdaxiləyə baxmayaraq, baş çavuş Abbasov Elmir Sakit oğlunun həyatını xilas etmək mümkün olmayıb.

DİN-in Mətbuat Xidmətinin Bərdə regional qrupunun baş inspektoru, polis kapitanı Aslan Qiyaslı bildirib ki, Cəbrayıl rayonunda baş vermiş yol-nəqliyyat hadisəsi ilə əlaqədar Rayon Polis Şöbəsində Cinayət Məcəlləsinin müvafiq maddəsi ilə cinayət işi başlanılıb, istintaq aparılır.