“Sosial problemlərin həllində yalnız dövlət qurumları deyil, özəl müəssisələr də iştirak etməlidir”.
SosialMedia.az-ın məlumatına görə, bunu “Sosial xidmətlər sahəsində QHT-lərlə əməkdaşlıq: nailiyyətlər və perspektivlər” mövzusunda konfransda Azərbaycan Prezidenti yanında Qeyri-Hökumət Təşkilatlarına Dövlət Dəstəyi Şurasının sədri, Milli Məclisin deputatı Azay Quliyev deyib.
- Quliyev qeyd edib ki, Prezident İlham Əliyev tərəfindən sosial sahədə həyata keçirilən islahatlar yalnız ölkə ictimaiyyəti tərəfindən deyil, beynəlxalq qurumlar tərəfindən də yüksək qiymətləndirilir: “Beynəlxalq reytinq cədvəllərində Azərbaycanın tutduğu pillənin yüksəlməsi onu göstərir ki, hökumətin əsas məqsədi əhalinin rifahının yüksəldilməsidir. Bu baxımdan sosial sahədə əldə olunan nailiyyətlər bizi sevindirir. Eyni zamanda qeyri-hökumət təşkilatlarının da bu sahədə aktivliyi gündən-günə artır. Bu sahədə həqiqətən də vətəndaş təşəbbüsünə böyük ehtiyac var. Əsas hədəflərimizdən biri budur ki, sosial yönümlü problemlərin həllində QHT-lərin iştirakını maksimum dərəcədə dəstəkləyək”. Azay Quliyev deyib ki, son iki ildə Şuranın maliyyələşdirdiyi layihələrin təxminən 70 faizi məhz sosial sahəyə aiddir. O qeyd edib ki, bu sahədə Azərbaycanda peşəkar, hətta beynəlxalq səviyyəli layihələr həyata keçirə bilən təşkilatlar var.