Sosialmedia.az xəbər verir ki, Nyu- York şəhərində yerləşən BMT-in Baş Qərargahında Baş Assambleyanın vərəm və universal tibbi təminatla bağlı dinləmələrində “Sağlamlığa Xidmət” İctimai Birliyinin icraçı direktoru Pərvanə Vəliyeva iştirak edib.
Belə ki, 2023-cü il sentyabr ayında BMT-in Mənzil Qərargahında Baş Assambleyanın vərəmlə bağlı yüksək səviyyəli görüşü keçiriləcək. BMT üzvü olan ölkələrin liderləri 2030-cu ilədək vərəmə son qoymaq üçün hazırlanacaq siyasi bəyannaməyə imza ataraq öhdəliklər götürəcəklər. Bəyannamə qəbul olunmadan öncə BMT bir çox ölkədən mütəxəssisləri dəvət edərək vərəmlə bağlı onların dinləmələrdə iştirakını təmin edib.
İclasda P.Vəliyeva Azərbaycan Vərəm əleyhinə QHT Koalisiyasına üzv olan Vətəndaş Cəmiyyəti təşkilatlarını və vərəmin təsirinə məruz qalan icma nümayəndələrini təmsil edib.
Vərəmlə mübarizə aparan vətəndaş cəmiyyəti təşkilatlarının siyasi bəyannamədən gözləntiləri 2030-cu ilədək ən son beynəlxalq protokollara əsasən, vərəmli xəstələrə profilaktika, diaqnostika, müalicə və qayğının təmin edilməsidir.
